An pagrasay kan daga (Ingles: landslide o landslip), iyo an nagkapirang porma nin mass wasting na pwedeng kabali an mahiwas na rona nin paghiro kan kadagaan, siring kan paghulog kan mga gapo, pagrasay kan laboy, pagkawarak kan tukadunon na bakilid, pagbagsak kan mga debris.[1][2]
An pagrasay kan daga nangyayari sa manlaenlaen na kapalibotan, karakterisado na tukadunon na bakilid o bako masyadong tukadunon na bakilid, poon sa kabukidan sagkod sa mga ampas sa baybayon o sa irarom pa ngani nin tubig, na sa siring inaapod sindang mga pagrasay kan daga sa irarom kan dagat.[3] An grabidad iyo an pangenot na pwersang nagmomotibar na mangyari an sarong pagrasay kan daga, alagad may iba pang bagay na nakakaapektar sa kasarigan kan bakilid na nagtatao nin espesipikong mga kamugtakan na nagpapangyaring dai magbigay an bakilid. Sa dakol na kamugtakan, an pagrasay kan daga nagpopoon sa sarong espesipikong pangyayari (arog baga nin makosog na pag - oran, linog, bakilid na naputol nin tinampo, asin dakol pang iba), minsan ngani dai ini pirmeng iidentipikaran.